حكاية قطة

ح استرسل فى الكلام اعذرونى

كان عندى قطة سيامى حلوة أوى كنت أول مرة فى حياتى أحب قطة بالشكل ده وكان ليا جار بيحب يربي القطط وكان عنده قطة سيامى بيضا زى الفل وماتت كان بيحب قطتى أوووى وكان كتير ينده عليا ياخدها عنده كنت بسيبهاله كان بيأكلهاا وبيحطلهاا لبن وهى كمان حبته جدا لدرجة إنى لما مالقيهاش عندى أعرف إنها تحت عنده وبعد شهور كتير القطة بتاعتى نزلت عنده ومامته فتحت الباب والقطة خرجت وضاعت دورنا عليها كتير من غير فايدة حزنت عليها جداا وهو كمان
بعدها بفترة جارى ده جاب قطة شيراز حلوة أووى كان لونها مشمشي فاتح كانت بتحب تطلع عندى كتير كنا بنحطلها لبن وأكل طول ماهو فى الشغل القطة بتاعته فوق عندى وبتقضى وقت طويل أوى معايا ومرة طلع ياخدها مرضيتش تنزل معاه وكانت ح تخربشه المهم أخدها بالعافية
ونيجى للجزء المهم فى القصة بقى
المهم القطة غابت يومين موش ظاهرة أنا قولت يمكن هو أجازة نزلت أسأل عليها لاتكون عيانة ولا حاجة
أنا فعلااا كنت مهتمة بالقطة جداا وكنت بفكر فيها كتير كانت قوية ومشيتها حلوة زى الطاوس لما يتباهى وكانت ذكية جداً لدرجة إنها كانت بتتعمد تستخبى منى علشان تشوف أنا ح أدور عليها ولا لاء كانت بتحب تشوف إهتمامى بيها
نرجع تانى للقصة لما نزلت أسأل عليها فالقيت جارى بيقولى عاوزك تفهمى حاجة القطة دى بتاعتى أنا وعمرها ماحتكون لحد غيرى مهما اهتم بيها ومهما هى حبته فاليكى حدود معينة لأنها مهما اتعلقت بيكى فابرضه موش حتفضل معاكى على طول وعمر علاقاتك بيها ما ح تخرج بره إطار الكام ساعة اللى بسيبهالك فيهم
هناا سكت وسرحت يمكن غيبت عن الوجود لدقايق كنت بدور على رد لقيت نفسي بفكر
إيه الآنانية بتاعة البشر دى ممكن تكون غيرة ويمكن حب إمتلاك موش عاوز حد ينازعه فيها
وفضلت أفكر فى نفسي أنا فعلااا حبيت القطة بس عمري ماخطر فى بالى إنى أمتلكها بقلق لما بتغيب علياا بس عمرى ما اعترضت على غيابها رغم إنى فعلا حبيتها
إستغربت أفعال البشر حتى المشاعر عاوزين يحطولها سقف وحدود
ليه تضيع الحالة الحلوة اللى كانت بينى وبين القطة ؟؟  أنا كنت سعيدة بيها وكنت راضية بالوقت القصير اللى كانت بتقضيه معايا
إنت أنانى .. حقيقي أنانى
فوقت من التوهة اللى جاتلى وماردتش إلا بابتسامة صفرا على وشي وسيبته ومشيت
وقررت إنى موش ح أسأل على القطة تانى
أه ح توحشنى بس ح أنساها ولو قلقت عليها ح أدوس على قلبي علشان مايكررهاش تانى .

دى رسالة موجهة لكل أصحاب القطط "القلوب" بطلوا أنانية

"قصة واقعية" لكن موش بطولة القطة مجرد اسقاط