فشل العلاقات

الحقيقة موش لاقية كلام يتقال الكلام خاني وانا بحاول ارتجل مافيش حاجة مترتبة في دماغي غير ان الحياة قصيرة اوي ليه نعيشها في نكد وقرف واهمال وقلة تقدير من اقرب الناس لينا دي حياة واحدة وح تتعاش مرة واحدة ماتخلوش حد يحبطكوا ولا ينكد عليكوا كفاية اوي علينا همومنا ومشاكلنا اليومية اللي بنقابلها في حياتنا لما نختار انسان نقربه من حياتنا سواء صديق او حبيب لازم على الاقل نكون متوافقين فكرياً لازم نكون فاهمين بعض لازم نكون حاسين ببعض لازم يكون في تكافوء بينا ماينفعش تقرب من انسان مافيش بينكم اي شئ مشترك مافيش بينكم تفاهم الخناق بيكون على اتفه سبب لايمكن تكون دي علاقة صحيحة دي علاقة ملغبطة ومتداخلة في بعضها مافيهاش غفران لأن مافيش حد فيكم بينسى للتاني بتسامحوا بعض بالبوء بس لكن لسة في سواد متشال جوة القلب وبيطلع في اي خلاف صغير دي لايمكن تبقى علاقة سليمة ماينفعش طرف يفضل يدي بس وطرف يفضل ياخد بس ماينفعش يبقى في طرف اناني لازم الطرفين يكونوا مبسوطين مع بعض ماينفعش طرف يفرض قوانين والطرف التاني ينفذها خوفاً على زعله وبس في مليون حاجة ممكن نتكلم فيها ومليون سبب لفشل اي علاقة ونرجع نقول ليه ؟

لازم الاول نختار صح ونحط قوانين احنا الاتنين للعلاقة ماينفعش طرف يبقى اقوى من الطرف التاني 

العلاقات مهمة اوي في حياتنا فالازم نكون متفاهمين لأن فشل العلاقة بيأثر بشكل مباشر على حياتنا 

درس

عاوزة أقول كلام كتيرررر بس موش عارفة اتكلم قولت طيب أكتب بس حتي وأنا بكتب الكلام موش عاوز يطلع بس ح أحاول علشان أنا فعلاً حاسة إني بتخنق وروحي بتتسحب مني حتى عيوني محبوس جواها الدموع بتحايل عليها تخرج معانداني كأنها بتقولي إتخنقي أكتر وأكتر لحد ماروحك تطلع خالص علشان بعد كدة ماتمشيش ورى مشاعرك وتهملي عقلك ، علشان تفهمي إنك مجرد بشر آلة ممكن تعطل في يوم أو يصيبها خلل 
المشاعر موش ح تعالجك أو تبعد عنك الموت مافيش كائن حي بيتغذى علي المشاعر ، علشان تتوجعي وتتألمي وماتلاقيش حد يحس بيكي مهما قالولك إحنا جنبك وحاسين بيكي فا ده مجرد كلام بيواسُوكي بيه لكن إيدك انتى اللي في النار موش هُما ،، إنتى اللي بتتحرقي موش هُما ،، الآلم اللي جواكي مابيتنقلش لحد غيرك مهما كانت درجة قُربه منك ، علشان تتعلمي إنك مهما كنتي غالية عند حد فا موش ح تكوني أغلى عنده من نفسه ، علشان تتعلمي إن عُمر ماحد ح يجي علي نفسه عشانك مهما كان بيحبك
علشان تتعلمي ماتصدقيش آى كلمة تتقالك ، علشان تفوقي وتعقلي وتعرفي إنك كبرتي ، علشان ماتخليش مصيرك في إيد حد غيرك ، علشان حياتك إنتي بس اللي أدرى بيها موش حد غيرك .